Читать «БАГАМ НОЧЫ РОЎНЫЯ» онлайн - страница 144
Сергей Песецкий
— Ты нас баішся.
Я падхапіўся з ложка.
— Не, не баюся. Гіджуся. Разумееце! Вы агідныя! Навошта вы паказваецеся, такія агідныя?
Тады яны ўзяліся за рукі і пачалі танчыць. Але наступнай ночы не прыйшлі. Я думаў, што ўсё ўжо мінула. Каля другой гадзіны пагасіў сьвятло і хацеў заснуць. Раптам пачуў ля дзьвярэй шолах… лёгкі, нібы сьвіст, бесьперапынны. Я стараўся ня чуць яго, але шолах рабіўся ўсё гучнейшы. Тады я ўскочыў з ложка і паглядзеў на пакой. У поўнай цемры я ўбачыў чорную масу, што ўціскалася праз шчыліну пад дзьвярыма. Яна ўсё больш успухала, набываючы форму вялізнай тушы гіпапатама, і расла, расла, расла… Яна выглядала ўжо як абалонка батона, якую надзімалі газам. Раптам я заўважыў два маленькія, злосныя вочкі. Яны былі зеленаватыя. У іх паблісквалі залатыя іскры. І яны ўсё набліжаліся да мяне. Тады я схапіў са століка папяльнічку і кінуў у гэтую чорную тушу. Вочы замігцелі ў паветры і пачулася працяглае хрыпеньне. У калідоры за дзьвярыма я пачуў хіхіканьне.
Праз два дні да мяне прыйшоў ружовы слонік. Дзіўна, што я аднолькава бачыў яго і з расплюшчанымі, і з заплюшчанымі вачыма. Ён быў памерам з сабаку. Стаяў пасярэдзіне пакою, пераступаючы з нагі на нагу — нібы ідучы на месцы — і сьвідраваў мяне чырвонымі вочкамі. А ў такт ударам яго ног шаргаталі па кутах, пад ложкам, за дзьвярыма чыесьці рукі.
Цяпер слон прыходзіць штоночы. Ён вельмі злосны, але не нападае на мяне. Дзіўна, што я яго зусім не баюся. Лепей слон, чым тыя пачвары. Аднак я ведаю, што яны ня зьніклі назаўжды — толькі часова затаіліся. Але калі са мной хтосьці ёсьць, то гэтыя кашмары мяне ня мучаць. Таму я стараюся ніколі не заставацца адзін на ноч. Колькі разоў я ўсю ноч хадзіў па вуліцах, баючыся вярнуцца дадому. І цешыўся з таго, што дастаўляю ім расчараваньне. А калі раніцай вяртаўся ў нумар, то з агідай дакранаўся да прадметаў. Я ведаў, што яны ўсё абмацалі, абнюхалі, можа, нават спалі ў маім ложку.
Я два разы мяняў нумар. Але іх немагчыма падмануць. Яны заўжды мяне знаходзяць.
Сёньня размаўляў са Станельскім. Грошай, што належалі мне за працу, ён ня даў. Пачаў выкручвацца і клясьціся, што ўсё мне верне. Я зрабіў выгляд, што веру яму, і сказаў, каб ён узяў трэцяе заданьне… Я зрабіў гэтаму нягодніку рэпутацыю: яго разглядаюць за агента, які падае вялікія спадзяваньні, бо я ўжо другое заданьне выканаў за яго на сто працэнтаў. Калі ён прыйшоў да мяне вечарам і даў заданьне, я сказаў:
— Гэтае заданьне вы, даражэнькі, ужо самі выканаеце.
— Але ж я ня маю ніякай магчымасьці.
— Я, калі пачынаў працу выведніка, таксама ня меў ніякай магчымасьці. Нават грошай ня меў.
— Але вы мяне ўвялі ў зман.
— Ах, так! Тады пагаворым іначай. Я ніколі не парушаю слова. Можа, таму заўсёды ўсім веру. Але калі заўважаю падман нават у найдрабнейшых рэчах — ня веру ўжо ні ў чым. Калі вы мяне першы раз падманулі, я цалкам страціў да вас давер. Калі я даў сябе падмануць другі раз, то толькі таму, што хацеў яшчэ раз пацьвердзіць сваю выснову. І пацьвердзіў. А цяпер, калі ж бы вы заплацілі мне ўсё, калі ж бы вы нават прапанавалі мне 10 разоў столькі, колькі мне належыць, я вам ні ў чым не паверу. Ня думайце, што мне так важныя грошы. Гэта ж дробязь. Зрэшты, грошай у мяне досыць — я пару разоў добра зарабіў. Але мне важна не дазволіць цешыцца з уласнай хітрасьці людзям, якія апроч бессаромнасьці нічога ў сабе ня маюць. І я на вас не злуюся. Нават зычу вам посьпеху ў працы. Можа — у чым я сумняваюся — вы зробіцеся добрым агентам. Тады я пастараюся забыць, як вы са мной калісьці абышліся.
