Читать «Брама неўміручасці» онлайн - страница 11
Кандрат Крапіва
Дабрыян. Я не раздаю неўміручасць па знаёмству.
Наташа. Значыць, адмаўляеце? Асуджваеце на смерць?
Дабрыян. Мілая Наташа! Вы так мяне ашаламілі, ашарашылі, агарошылі, што я сёння нічога больш разумнага сказаць вам не магу.
Наташа. Разбэшчаная нахабная дзеўка прапануе вам свае паслугі. I вас гэта шакіруе. Так гэта трэба разумець?
Дабрыян. Ну хто скажа, што вы разбэшчаная? Ніводнай плямінкі я не заўважыў на вашых паводзінах. Але строй думак у нас, відаць, розны. Вы жывяце ўжо заўтрашнім, а я яшчэ сённяшнім, а можа, і ўчарашнім. Мне вашы прапановы здаюцца крыху дзіўнымі, экстравагантнымі, разважанні занадта рацыянальнымі.
Наташа. Бывайце, благачасцівы старча. Пара карміць праклятага пацука.
Дабрыян. Чаму праклятага?
Наташа. Можа, з гэтага дня я яго зненавіджу.
Дабрыян
Наташа. Пацуку неўміручасць, а я магу здыхаць.
Дабрыян. Наташа, вы мяне палохаеце.
Наташа. Ага, спужаліся! Не бойцеся, не атручу.
Дабрыян
Марына Сяргееўна
Дабрыян. Тут мне Наташа праблемку адну падкінула. Аж у вачах цёмна стала.
Марына Сяргееўна. Яна дзяўчына кемлівая.
Дабрыян. Больш, чым ты можаш уявіць.
Марына Сяргееўна. Вось бы каго табе ў неўміручыя спадарожнікі.
Дабрыян. Ды што гэта сёння такое!
Марына Сяргееўна
Дабрыян. Давай пакінем пра гэта. Ёсць справы больш актуальныя.
Марына Сяргееўна. Самае актуальнае цяпер для цябе — паснедаць. А то пабяжыш не еўшы.
Дабрыян. Шклянку чаю.
Марына Сяргееўна
Дабрыян. Можа, падбілі каго.
Марына Сяргееўна. Нешта сюды ўсе глядзяць… Рукамі махаюць…
Дабрыян. Ці не пажар?
Марына Сяргееўна. На пажар непадобна. Як быццам вітаюць каго.
Дабрыян. Няхай вітаюць. Пайду апрануся.
Марына Сяргееўна. Яшчэ нехта. I паснедаць не дадуць.
Дабрыян. Што там яшчэ такое? Замах? Дыверсія? Глупства якое-небудзь. Няхай зойдзе.
Караўкін. Добры дзень, Барыс Пятровіч. Віншую вас з вялікім адкрыццём. Маё прозвішча — Караўкін. А сваё вы можаце не называць: яно ва ўсіх на языку.
Дабрыян. А што там такое?
Караўкін. Не там, а тут. Вы ж неўміручасць выдумалі. Сёння пра гэта па радыё аб‘явілі.
Дабрыян. Вось яно што!
Марына Сяргееўна. А я і радыё не ўключала.
Караўкін. Вось яны і сабраліся.
Дабрыян. Што, маніфестацыя назначана?
Караўкін. Нічога не назначана. Самі прыйшлі. Вас прывітаць. А на самай справе баяцца, каб не спазніцца. Думаюць, што неўміручасць тут ужо ў пакеціках раздаюць. Па паўкіло на рыла.
Дабрыян. Што ж мне трэба рабіць?
Караўкін. Нічога вам не рабіць. Вы ўжо зрабілі. Няхай яны пакрычаць. Гэта ўсё ў вашу карысць. Чым больш крыку, тым больш славы. А мы з вамі пагаворым пра сёе пра тое.