Читать «У добры час» онлайн - страница 9
Іван Шамякін
Максім таксама спыніўся, з халаднаватай цікавасцю разглядаючы яе.
«Пастарэла», — і яму чамусьці стала шкада яе, захацелася прытуліць, прыласкаць.
Першая загаварыла Маша. Спытала:
— Ты-ы?.. — нібы не паверыла ўласным вачам.
Максім хутка падышоў, працягнуў руку.
— Я. Не пазнаеш?
Яна спачатку разгублена глянула на сваю далонь, выцерла яе аб кажушок, потым шчасліва засмяялася і моцна сціснула яго руку.
— З прыездам, Максім.
— Дзякую. Аднак... давай-жа хоць пацалуемся.
— Што ты! Глядзяць.
Сапраўды, аглянуўшыся, Максім убачыў, што ў бліжніх хатах у кожным акне да шыб прыліплі твары. Людзі з цікавасцю назіралі за іх крыху незвычайнай сустрэчай. Гэта збянтэжыла абодвух. Маша сарамліва апусціла вочы. Максім таксама некаторы час не мог знайсці патрэбных слоў, каб пачаць гаворку.
— Ты што... працавала? Сёння-ж свята.
— А мы ўжо скончылі. Невялічкая работка была... Рыхтуемся да вясны.
— Цяпер — да вясны?
— Але... А ты куды? — яна ясным, шчаслівым позіркам глянула яму ў твар.
— У Дабрадзееўку схаджу. Дамоўлюся наконт партыйнага ўліку.
Маша зноў апусціла вочы, прыдушыла ўздых, што ледзь-ледзь не вырваўся з грудзей, з лёгкім дакорам сказала:
— А калі-ж гэта мы сустрэнемся? Калі прыехаў і вачэй не паказваеш.
Ён моцна сціснуў яе шурпатую ад працы руку.
— Прыду, Машок, прыду...
— Калі?
— Сёння абавязкова.
У яе вачах зноў бліснула радасць.
— Значыцца, чакаць?
— Чакай.
— Ну, добра. Ідзі. Не будзем развітвацца. — Яна пяшчотна правяла рукой па яго грудзях, лёгенька адштурхнула. А адышоўшы некалькі крокаў, павярнулася і яшчэ раз напомніла: — Глядзі-ж, Максім...
Алеся чытала, калі Маша зайшла ў хату.
Яна стаяла на ўслоне на каленях, схіліўшыся над сталом, і рогам касынкі выцірала слёзы.
— Зноў, Алеся! Ну і дурніца! Хіба-ж так можна? Над кожнай кніжкай плакаць — слёз нахопіць.
Дзяўчына закрылася далоняй і, не адказваючы, чытала далей. Хвілін праз колькі, відаць, скончыўшы, яна, урэшце, адарвала ад кнігі чырвоныя ад слёз вочы, паглядзела на сястру, з вачэй яе пырснулі іскрыстыя праменні захаплення. Маша скінула кажушок, развязала хустку і села каля Алесі, абняла яе за плечы, якія ўсё яшчэ ўздрыгвалі, але невядома — ці ад плачу, ці ўжо ад смеху.
— Дзіўная ты! Што гэта?
— «Тры сястры» Чэхава. Чытала?
— Чытала. Але, помніцца, не плакала. Шкада іх, але... Я толькі яскравей адчувала сваё шчасце...
— Вось... Шкада... Якое ў іх было жыццё, Машанька! Страшна. Глядзі, які смутак у словах Ірыны, калі яна паўтарае: «У Маскву! У Маскву! У Маскву!» А гэтыя вось заключныя словы, што Ольга гаворыць. Слухай, Машанька,—і Алеся пачала чытаць. Прачытаўшы, яна заплюшчыла вочы, шэптам паўтарыла апошнія словы і раптам імкліва абняла Машу.
— Як мне хочацца з такой-жа сілай напісаць пра наша жыццё. Каб з кожнага слова пырскала радасць, шчасце. Каб людзі чыталі — і ў іх вырасталі крыллі.
— А ты паспрабуй.
Алеся паківала галавой і сур'ёзна адказала:
— Не-е... Не здолею. Ты-ж ведаеш, якія бездапаможныя мае вершы.
— Не бядуй. Калі-небудзь напішаш. Я веру ў твой талент. Аднак... Я цябе слухала. Цяпер ты мяне паслухай. Ведаеш, каго я толькі што сустрэла?