Читать «Эхиней Эхин (Книга Бытия на бурятском языке)» онлайн

Хүндэтэ уншагша!

Библиин нэгэ номой оршуулга Танай анхаралда дурадханаб-ди. Библи болбол дэлхэйн уран һайханай болон шажан мүр-гэлэй талаар соёл болбосоролой эгээл мэдээжэ дурасхаалта зүйлнүүдэй нэгэн, 77 номһоо бүридэдэг, «Номой ехэ ном» гээд заримдаа тэрэниие нэрлэдэг юм. «Эхинэй эхин» — Библиин түрүүшын ном.

Россиин Библиин бүлгэмэй шугамаар «Эхинэй эхин» буряад хэлэн дээрэ оршуулагдаба. Библиин номуудые эхэ хэлэнһээ оршуулхын тула буряад литераторнууд хоёр жэлэй туршада Санкт-Петербургда Библи оршуулгын гол ёһонуудые болон эртэ урдын еврей хэлэ шудалаа. Табан жэлэй туршада Биб-лиин 20 номой оршуулгын түрүүшын вариантнууд бэлдэгдээ, оршуулагшадһаа гадна экзегетическэ болон филологическэ редакторнууд эндэ хүдэлөө. Оршуулга экзегетическэ талаһаа хэр зүб тодо гээшэб гэжэ шалгаха ажалые Библиин нэгэдэмэл бүлгэмүүдэй консультант хүтэлбэрилдэг, харин проектые бү-хыдэнь Россиин Библиин бүлгэмэй Санкт-Петербургын таһаг хүтэлбэрилэн ябуулна.

Мэргэжэлтэдэй ехэ бүлэгэй ажалай үрэ дүнтэй буряад оло-ниитые танилсуулхын тула «Эхинэй эхин» гэжэ номые туршан толилхо гэһэн шиидхэбэри Россиин Библиин бүлгэм нэгэ хэды жэлэй урда тээ абаһан юм. Элдэб мэргэжэлтэдэй — хэлэ бэшэ-гэй эрдэмтэдэй, уран зохёолшодой, элдэб шажан мүргэлнүүдэй түлөөлэгшэдэй манай ажал тушаа һанамжануудые шагнаха дуратай байнабди, тэдэниие анхаралтайгаар шэнжэлжэ, ор-шуулгын ажал һайжаруулгада хэрэглэхэ һанаатайбди.

Уншахада зохид байхын тула текст соо багахан гаршагуудые үгөөбди, ойлгоходо туһалха материалнуудые номой һүүл ба-гаар ниитэлбэбди. Эртэ урдын Дүтын Дурна зүгэй болон эртэ урдын Палестинын картанууд, угай һарбаалжан, Библиин эгээл орёо терминүүдые ойлгуулһан толи энэ ном соо оруулагдаа. Гадна, «Эхинэй эхин» гэжэ номой гол темэнүүд болон хэһэгүүд Түгэсхэлэй үгэ соо үгтэнхэй.

Уншагшадые һанамжануудаа иимэ хаягаар эльгээхые гуй-набди:

191014, Санкт-Петербург, а/я 127, Санкт-Петербургское отделение Российского Библейского Общества.

Харюусалгата редактор Ирина Гомбоин

эхинэй эхин

ЯАГААД БҮХЫ ЮУМЭН ЭХИЛЭЭБ

Оршолон юртэмсые бүтээлгэ

1

¹ Эхинэй эхиндэ Бурханай оршолон юртэмсые бүтээжэ захалхада, ²газар дэлхэйн үшөө мүндэлөөдүйдэ, оёоргүй гүнзэгы уһан дээгүүр — харанхы, гансал Бурханай һүлдын уһан дээгүүр элин байхада, ³Бурхан:

— Туяа гэрэл оршог! — гэжэ айладхаба. Туяа гэрэл бии болобо. ⁴ Бурхан туяа гэрэлэй һайхан байһые хараад, тэрэнээ харанхы-һаа илган амяарлаба. ⁵Тиигээд Тэрэ туяа гэрэлые «үдэр» гэжэ нэрлэбэ, харин харанхые «һүни» гэбэ.

Иигээд үдэшэ үнгэржэ, һүни болоод, үглөө эхилэн, нэгэдэхи үдэр дүүрэбэ.

⁶ Хоёрдохи үдэрөө Бурхан:

— Уһан хоёр тээшээ хубаараг! — гэжэ захирба. ⁷Удаань Бур-хан уһые хоёр тээшэнь хубаахадаа, нэгыень дээрэ тогтоожо, нүгөөдыень доро болгобо. ⁸ Хоёр уһа илгаһан зүйлые Тэрэ «тэнгэри» гэжэ нэрлэбэ. Иигээд үдэшэ үнгэржэ, һүни болоод, үглөө эхи лэн, хоёрдохи үдэр үн гэрбэ.