Читать «Тлумачальны слоўнік па інфарматыцы» онлайн - страница 3
Мікола Савіцкі
Прадстаўлены “Тлумачальны слоўнік па інфарматыцы” прафесара М.І. Савіцкага — вынік шматгадовых творчых пошукаў і руплівай працы на ніве фармавання беларускамоўнага мыслення ў навуцы і адукацыі. Слоўнік абагульняе вопыт дванаццацігадовага выкладаньня на беларускай мове розных дысцыплін па інфарматыцы ў Беларускім дзяржаўным эканамічным універсітэце, а таксама працы ў тэрміналагічнай камісіі пры Таварыстве беларускай мовы імя Францішка Скарыны.
Аўтар дае тлумачэнне больш як 2500 тэрмінам, што найбольш часта ўжываюцца ў галіне інфармацыйных тэхналогій, інфарматыцы, вылічальнай тэхніцы і кіраванні. М.І. Савіцкаму удалося канструктыўна спалучыць існуючы матэрыял па тлумачэнні тэрмінаў з асаблівасцямі беларускай мовы. У слоўніку адразу за фармулёўкай тэрміна даецца ягоны англамоўны адпаведнік, што выключае патрэбу ў рускамоўнай паралелі. Тым самым зацьвярджаецца поўная самастойнасць беларускамоўнай тэрміналогіі па інфарматыцы, незалежнасць яе ад іншых моў за выключэннем мовы-першакрыніцы.
“Тлумачальны слоўнік па інфарматыцы” прафесара М.І. Савіцкага — гэта праца чалавека адданага беларускай справе, чалавека, які прысвяціў жыццё беларускаму нацыянальнаму адраджэньню, беларускай культуры і нацыянальнай адукацыі. Нягледзячы на цяжкі перыяд у развіцці беларускай мовы, што настаў пасля ўвядзення двухмоўя, наша мова развіваецца па ўсіх кірунках. Праведзена вялікая праца па распрацоўцы адзінага беларускага правапісу. Унутраная і знешняя палітыка нашай краіны ўсё больш і больш засяроджваецца на нацыянальных праблемах, на распрацоўцы беларускай нацыянальнай ідэі. І ў гэтым працэсе ўнёсак прафесара Савіцкага — “Тлумачальны слоўнік па інфарматыцы” — заслугоўвае самай высокай адзнакі. Безумоўна, у будучым, калі беларуская мова запануе паўсюдна і стане адзіным афіцыйным сродкам зносінаў у Беларусі, “Тлумачальны слоўнік па інфарматыцы” стане настольнай кнігай многіх студэнтаў і выкладчыкаў.
Пералік умоўных скарачэнняў
АС — аперацыйная сістэма
ГМД — гнуткі магнітны дыск
ЛВС — лакальная вылічальная сетка
МС — магнітная стужка
ПЗП — пастаянная запамінальная прылада
ПВМ — персанальная вылічальная машына
СКБЗ — сістэма кіравання базамі звестак
ЭВМ — электронная вылічальная машына
ЗВІС — звышвялікая інтэгральная схема
ДАС — дыскавая аперацыйная сістэма
ВІС — вялікая інтэгральная схема
НМД — накапляльнік на магнітных дысках
НМС — накапляльнік на магнітных стужках
АП — аператыўная памяць
ПЗ — праграмнае забеспячэнне
РБЗ — размеркаваная база звестак
СШ І — сістэма штучнага інтэлекту
ЦП — цэнтральны працэсар
ЭС — экспертная сістэма
МЗ — мова запытаў
ММЗ — мова маніпулявання звесткамі
МАЗ — мова апісання звестак
АПЗ — апаратура перадачы звестак
ТБМ — Таварыства беларускай мовы імя Францішка Скарыны
Беларускі алфавіт
Аа Бб Вв Гг Дд Дж дж Дз дз Ее Ёё Жж Зз
Іі Йй Кк Лл Мм Нн Оо Пп Рр
Сс Тт Уу Ўў Фф Хх Цц Чч Шш
Ыы Ьь Ээ Юю ЯЯ
А
“АПОЛЛОН” (Apollo speech system) — сістэма ўзнаўлення гукаў мовы, якая дазваляе праслухоўваць набраны тэкст праз навушнікі альбо гучнагаварыльнік.
