Читать «Творения. Т.2. Разное» онлайн - страница 3
Митрополит Филарет Дроздов
Тя убо, Владыку, Господа и Благодетеля славим, хвалим, благодарим, поем и величаем, и, от самых щедрот Твоих в вере и уповании утверждение и дерзновение пред Тобою приемлюще, смиренно молим: сохрани престол и царство Благочестивейшаго Самодержавнейшаго Великаго Государя Императора Александра Николаевича всей России в истинном величии, твердости и славе.
Прости, всемилостиве Господи, вся грехи наша и отец наших, и направи стопы наша к деланию заповедей Твоих.
Соблюди в нас православную веру в ея чистоте и силе, и да пребудет она, якоже бысть, средоточием общественнаго единения, источником просвещения, основанием и твердынею народнаго благонравия, правды законов, благодетельности управления, нерушимости благостояния.
Да не увянет и не изсохнет древнее насаждение добра, но да привиется к нему новое стеблие лучшаго, и да изыдет новый цвет благолепия и плод совершенства.
Тако призри на нас, и ущедри нас, да благословляеми Тобою, от дне до дне и от века до века благословим Тя, Господи.
Слава Тебе Богу, Благодетелю нашему, во веки веков. Аминь.
Просветившим Россию христианскою православною верою равноапостольным Великому Князю Владимиру и Великой Княгине Ольге, преемственне в течение веков созидавшим и укреплявшим единодержавие России Благоверным Царем и Великим Князем, новосозидавшим Российское царство и разширившим и прославившим оное в Бозе почившим Благочестивейшим Императорам и Императрицам, вечная память.
Всем избранным сынам России, в течение веков верно подвизавшимся за ея единство, благо и славу, на поприщах благочестия, просвещения, управления и победоносной защиты Отечества, вечная память.
Времена и лета в руце Своей положивый Господи, Твоим премудрым всеблагим Промыслом тысящелетне сохраняемому и возвращаемому царству Всероссийскому, пробави велию милость Твою и сохрани оное в вере и правде, во Богозаконии и благоустроении на лета и веки многие.
Господи Боже, Создателю и Спасителю мой, Благословенно да будет имя Твое святое!
Благодарение и слава Тебе, Господи, о всех благих, яже приях от Тебе в житии сем.
Ныне же скорбь и болезнь обретох и имя Твое призываю.
Поношения нападоша на мя. Положиша мя в рове преисподнем, в темных и сени смертней. Скорблю о сем, и по сей скорби разумеваю, яко согреших пред Тобою, и по грехам моим приидоша на мя беды. Ибо праведники Твои не унывающе и в темницах пояху Тебе, и во страданиях радовахуся.
И аще беззакония назриши, Господи, Господи, кто постоит? Яко несть человека, иже не согрешит.
Но Ты, Господи, грехи всего мира носиши и покаянием очищаеши. Верую, яко и мене, грешнаго, не отвержеши от лица Твоего. За весь мир Единородный Сын Твой излия Свою Божественную кровь. Верую, яко и мене от грехов моих омыти может и хощет.
Сего ради с Давидом глаголю: исповем на мя беззаконие мое, Ты же, яко благ, остави нечестие сердца моего.
