Читать «Псалтирь на церковнославянском с ударениями» онлайн
Татьяна Трушова
Псалтирь царя и пророка давида
Молитвы перед началом чтения Псалтири
Кафи́сма пе́рвая
Кафи́сма втора́я
Кафи́сма тре́тия
Кафи́сма четве́ртая
Кафи́сма пя́тая
Кафи́сма шеста́я
Кафи́сма седма́я
Кафи́сма осма́я
Кафи́сма девя́тая
Кафи́сма деся́тая
Кафи́сма единаяна́десять
Кафи́сма втораяна́десять
Кафи́сма третияна́десять
Кафи́сма четвертаяна́десять
Кафи́сма пятаяна́десять
Кафи́сма шестаяна́десять
Кафи́сма седмаяна́десять
Кафи́сма осмаяна́десять
Кафи́сма девятаяна́десять
Кафи́сма двадеся́тая
Молитвы по прочтении нескольких кафисм или всей Псалтири
Пе́сни Свяще́ннаго Писа́ния
Псалтирь царя и пророка давида
Молитвы перед началом чтения Псалтири
Разумно да будет, како подобает особь пети Псалтирь
Аще иерей, глаголет:
Благослове́н Бог наш, всегда́, ны́не и при́сно и во ве́ки веко́в.
Аще ли ни, глаголи умиленно: Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас.
Ами́нь. Царю́ Небе́сный. Трисвятое. И по О́тче наш…
Тропари сия, глас 6
Поми́луй нас, Го́споди, поми́луй нас, вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.
Слава: Честно́е проро́ка Твоего́, Го́споди, торжество́, Не́бо Це́рковь показа́, с челове́ки лику́ют А́нгели. Того́ моли́твами, Христе́ Бо́же, в ми́ре упра́ви живо́т наш, да пое́м Ти: Аллилу́иа.
И ныне: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя: посети́ немощству́ющую мою́ ду́шу и моли́ Сы́на Твоего́ и Бо́га на́шего да́ти ми оставле́ние, я́же соде́ях лю́тых, Еди́на Благослове́нная.
Го́споди, поми́луй (40). И поклонися, елико ти мощно.
Таже молитва
Святей Живоначальней Троице
Всесвята́я Тро́ице, Бо́же и Соде́телю всего́ ми́ра, поспеши́ и напра́ви се́рдце мое́, нача́ти с ра́зумом и конча́ти де́лы благи́ми богодухнове́нныя сия́ кни́ги, я́же Святы́й Дух усты́ Дави́довы отры́гну, и́хже ны́не хощу́ глаго́лати аз, недосто́йный, разуме́я же свое́ неве́жество, припа́дая молю́ся Ти, и е́же от Тебе́ по́мощи прося́: Го́споди, упра́ви ум мой и утверди́ се́рдце мое́, не о глаго́лании усте́н стужа́ти си, но о ра́зуме глаго́лемых весели́тися, и пригото́витися на творе́ние до́брых дел, я́же учу́ся, и глаго́лю: да до́брыми де́лы просвеще́н, на суди́щи десны́я Ти страны́ прича́стник бу́ду со все́ми избра́нными Твои́ми. И ны́не, Влады́ко, благослови́, да, воздохну́в от се́рдца, и язы́ком воспою́, глаго́ля си́це:
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Таже постой мало, дондеже утишатся вся чувства. Тогда сотвори начало не вскоре, без лености, со умилением и сокрушенным сердцем. Рцы cиe: «Блаже́н муж…» тихо и разумно, со вниманием, а не борзяся, якоже и умом разумевати глаголемая.
ДАВИ́ДА ПРОРО́КА И ЦАРЯ́ ПЕСНЬ
Кафи́сма пе́рвая
Псалом 1
Псало́м Дави́ду, не надпи́сан у евре́й
1 Блаже́н муж, и́же не и́де на сове́т нечести́вых и на пути́ гре́шных не ста, и на седа́лищи губи́телей не се́де, 2 но в зако́не Госпо́дни во́ля eго́, и в зако́не Его́ поучи́тся день и нощь. 3 И бу́дет я́ко дре́во насажде́нное при исхо́дищих вод, е́же плод свой даст во вре́мя свое́, и лист eго́ не отпаде́т, и вся, ели́ка а́ще твори́т, успе́ет. 4 Не та́ко нечести́вии, не та́ко, но я́ко прах, eго́же возмета́ет ветр от лица́ земли́. 5 Сего́ ра́ди не воскре́снут нечести́вии на суд, ниже́ гре́шницы в сове́т пра́ведных. 6 Я́ко весть Госпо́дь путь пра́ведных, и путь нечести́вых поги́бнет.
