Читать «Учебник для сестер милосердия» онлайн - страница 199

Таже: О избавитися нам… И прочая.

Иерей возглас: Яко подобает Тебе всякая слава…

По сем диакон: Глас 4-й: Бог Господь…

Тропарь:

Творче и Создателю всяческих, Боже, дела рук наших, к славе Твоей начинаемая, Твоим благословением спешно исправи, и нас от всякаго зла избави, яко Един всесилен, и Человеколюбец.

Перед началом всякаго дела

Глас 4-й:

Агница Твоя, Иисусе, Татиано зовет велиим гласом: Тебе, Женише мой, люблю, и Тебе ищущи страдальчествую и сраспинаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.

Слава, глас 3-й:

Страстотерпче святый и целебниче Пантелеймоне, моли милостиваго Бога, да прегрешений оставление подаст душам нашим.

И ныне, глас 6-й:

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Слава, и ныне…

Диакон: Вонмем. Премудрость. Вонмем.

Чтец: Прокимен, глас 4-й:

Буди светлость Господа Бога нашего на нас, и дела рук наших исправи.

Стих: И призри на рабы Твоя и на дела Твоя.

Апостол, К Филипписием, Зачало 341:

Братие, якоже всегда послушаете мене, не якоже в пришествии моем точию, но ныне много паче во отшествии моем, со страхом и трепетом свое спасение содевайте. Бог бо есть дейстуяй в вас, и еже хотети, и еже деяти о благоволении. Вся творите без роптания и размышления, да будете неповиннии и цели, чада Божия непорочна посреде рода строптива и развращена, в нихже являетеся якоже светила в мире, слово животно придержаще, в похвалу мне в день Христов.

По Апостоле: Аллилуиа. (Трижды)

Диакон: Премудрость, прости, услышим Святаго Бвангелиа.

Иерей: Мир всем.

Лик: И духови твоему.

Иерей: От Матфея Святаго Евангелиа чтение.

Лик: Слава Тебе, Господи, слава Тебе.

Диакон: Вонмем.

Во время оно призвах Иисус обанадесять ученики Своя, даде им власть на дусех нечистых, яко да изгонят их, и целити всяк недуг и всяку болезнь. Сия обанадесять посла Иисус, заповеда им, глаголя: на путь язык не идите и во град самарянский не внидите: идите же паче ко овцам погибшым дому Израилева: ходяще же проповедуйте, глаголюще, яко приближися Царствие Небесное: болящыя изцеляйте, прокаженныя очищайте, мертвыя воскрешайте, бесы изгоняйте: туне приясте, туне дадите. (Мф. 10, 5–8)

По Евангелии, лик:

Слава Тебе, Господи, слава Тебе.

Слава Тебе, Боже наш, слава Тебе.

Пресвятая Богородице, спаси нас.

Святая мученице Татиано,

моли Бога о нас.

Страстотерпче святый и целебниче

Пантелеймоне, моли Бога о нас.

Слава, и ныне…

Кондак: Не имамы…

Достойно есть.

Диакон: Господу помолимся.

Лик: Господи, помилуй.