Читать «Православные старцы. Просите, и дано будет!» онлайн - страница 68

Радуйся, яко скорбящим и в бедах сущим мати и питательнице;

Радуйся, обидимых защитительнице;

Радуйся, душеполезными советы нам помогающая;

Радуйся, праведнице, от Бога нам низпосланная;

Радуйся, целительнице, недуги наша исцеляющая;

Радуйся, Божия благодати цельбоносный источниче;

Радуйся, блаженная старице, мати Макарие, молящаяся Христу Богу о спасении душ наших.

Кондак 10

Проповеднице Богоносная, блаженная мати Макарие, непрестанно боряся с силами тьмы, увещевала и утешала страждущих, болящих и скорбящих. Мы же укрепляемому тебе Богу воспоим: Аллилуия.

Икос 10

Возсия в тебе, блаженная старице Макарие, обильно Божественный дар прозорливости, когда избра тя Господь на подвиг служения Ему, яко Своему пророку открывая тебе прошлое и будущее в назидание, увещавание и утешение страждущих. Таковому Божию о тебе промышлению радующеся, зовем ти:

Радуйся, дар прозорливости Божественныя стяжавшая;

Радуйся, скорби людския собравшая;

Радуйся, свеща неугасимая в молитвах к Богу горящая;

Радуйся, страдания людския зрящая;

Радуйся, дерзновение пред Богом за страждущих явившая;

Радуйся, болезни и скорби в себе вместившая;

Радуйся, блаженная старице, мати Макарие, молящаяся Христу Богу о спасении душ наших.

Кондак 11

Все воинство Ангельское возрадовашеся, видя тя, блаженная старице Макарие, безсонныя ночи проводившую в непрестанных горячих молитвах к Богу, ими побеждающая миродержателя тьмы и прелести века сего. Темже воспоим к Богу: Аллилуия.

Икос 11

Вития многовещанныя, о, блаженная мати Макарие, не возмогут по достоянию восхвалити страдания твоя, за скорбящия и болящия претерпеваемыя; праведности твоея, и святости твоего подвига. Мы же, таковым дивящеся, в немощи нашей малыя сия хваления приносим ти:

Радуйся, Богу житием твоим угодившая;

Радуйся, простой люд возлюбившая;

Радуйся, за люди душу свою положившая;

Радуйся, заповедь Божию о любви сохранившая;

Радуйся, венец славы от Бога приявшая;

Радуйся, в житии своем ближняго самоотверженно возлюбившая;

Радуйся, блаженная старице, мати Макарие, молящаяся Христу Богу о спасении душ наших.

Кондак 12

Благодать Божию источаеши, блаженная старице Макарие, на всех чтущих твою память и прибегающих к заступлению и помощи твоей. Не лиши и нас, еще странствующих на земли, твоея помощи и заступления; источи от Бога благодать исцеления да поем Ему: Аллилуия.

Икос 12

Поюще многия твоя чудеса, блаженная мати Макарие, ублажаем твою праведную кончину, почитаем духовную память твою яко многоценныя молитвенницы за люди российския. Восхваляем тя, блаженная мати и всеусердно молим: помози нам, о, мати Макарие, своими святыми молитвами, да укрепит Господь волю нашу, дабы жити нам по заповедем Его и пребывати верными чадами в Церкви Православней. В Нем же, тобою утверждаемии, зовем ти:

Радуйся, праведности нас научающая;

Радуйся, скорби и немощи наша врачующая;

Радуйся, духовно укрепляющая;

Радуйся, веру Православную утверждающая;

Радуйся, Божия избраннице Отечества Российскаго;

Радуйся, блаженная старице, мати Макарие, молящаяся Христу Богу о спасении душ наших.