Читать «Житие блаженного Иоанна Власатого» онлайн - страница 2

В та же времена бе в Ростове Христа ради юродивый Третьяк, имя ж бе Артемей, и той бе во единой срачице зиму и лето, и все бегал, прибегал к Вознесению Господню и к Сидору чюдотворцу, и той многа чюдеса творил и обявлял. Некогда ж ему бывшу два дни и зело печальну, ни яде, ни пит, ни с кем глагола. В третий ж день нача по всему граду бегая вопити: стреляй, вешай, скачи, пей, умывайся, ложися. В третий же день с Москвы ведомо, государь царь Иван Васильевич бояр своих ближних и дьяков казнил многими муками двесте человек. Пища же его – бежучи, ухватит полуденежной колачь, и ухватит зубы своими, и держа в зубах, весь колачь исчиплет и розмечет, а что в роте, то была у него пища, и преставися без мене, положен на монастыре у Вознесения Господня против гроба Исидора чюдотворца, и на нем цка подписана.

Святый же Иоанн Власатый преставися в лето 7089-го сентября в 3 день, по повелению же его по трех днех вдовицею и отцом духовным погребен за градом у священномученика Власия за олтарем. И быша знамения велия и чюдеса многа, и громи и молнии, и пожжение домом и церквам. По преставлении же его вернии приходяще ко гробу его и доднесь, молебная совершающе к Богу и ко пречистой Богородице, и ко Иванну Предтече честнаго его собора, и пев молебен, и воду святив, и от гроба его приим персти, и положив во святую воду, и болящему дающе пити, и по всему телу его мажуще, и здрави отхождаху в домы своя. И святую воду и персть в домех своих болящим подающе пити, истирахуся, и здра(ви) бываху, не токмо человеци, но и скоти.

Ащели коему болящему по трех днех облегчения Господь не подаст, да посему уразумевают, и душа своя устрояют, и житие свое исправляют, к вечному блаженьству прелагаются.

Чудо 1-е

Некогда же ростовскому митрополиту Кирилу в старости своей от многаго труда и подвига и всенощнаго стояния и соборнаго пения, и коленнаго ради поклонения, впаде в недуг и отяся рука и нога, и всею плотию ослабе, ничим же не владе, и с места на место не можи преходити, но ни двигнутися, но точию в креслех его и в церковь приношаху. И многое время не литоргисаше, и отчаяся своего святительского престола, и ожидаше собе сего света к Богу отшествия, молитва же его к Богу от уст безпрестанно изходяща, и ко пречистой Богородице, и на помощь призывая ростовских чюдотворцов, да бы Господь Бог подал ему разрешение от недуга. И многое время пребысть в том недузе, и не презре Господь моления его, и внезапу возвещено бысть ему митрополиту о сем блаженнем Иванне Власатом, по многонародному же речению, о милостивом Иванне, како многонародное множество приходяще ко гробу его, и молящеся Господеви, пречистой Его Богоматери и крестителю Господню Иванну Предтечи честнаго его святаго собора, поют молебны и воду святую пив, и от гроба его взяв персти, и во святую воду влагающе, приобщаются, и всю плоть свою со святою водою стирают, и исцеление приемлют от Господа.

Митрополит же сие слышав от многих, зело порадовася, и повеле себе нести ко образу Иванна Предтечи и ко гробу Иванна Блаженнаго, и гда достигох и узре образ Спасов и пречистыя Богородицы и Иванна Предтечи, и гроб блаженнаго Иванна Власатого, нача молебная творити к Богу (сле)зы точа, яко струя, прося милости о исцелении. И егда нача чести святое Евангелие, и в той час митрополит пременися от недуга, и нача в себе всем владети. И вси людие видев, радующеся, хвалу воздая Христу Богу нашему и пречистой Богородице, и Предтечи Иванну, и блаженному Иванну Власатому и отиде от гроба здрав, радуяся. Видев же во граде вси люди митрополита здрава, хвалу воздаяху Богу нашему и Пречистой Богородице и Иванну Предтечи, и угоднику их блаженному Иванну, и проводив до кельи, и благословение получив, отиде в домы своя, радуяся. И нача литоргисати митрополит, якоже бе и прежде, и поживе едино лето и месяца шесть, и служа литоргию, отиде ко Господу.