Читать «Евдокия Московская» онлайн - страница 206

Глава 18

О явлении Ангела Господня.

И оттоле наипаче сугубо подвизашеся прилежными к Богу мольбами, о себе же и о чадех своих и о всей державе их, Господь же о всяческих исполняше прошения ея. Некогда же многия ради ея добродетели, посла к ней Господь Ангела своего за неколико время возвещающа ея из мира сего изшествие. Она же яко узре Ангела Божия, и от пресветлаго зрака его не може ни единаго слова проглаголати, многи дни бяше молча, и никому же беседоваше, но токмо маянием повеле призвати к себе икон-ныя писцы, и рукою указаваше им, яко да напишут на доске образ Ангела Господня, имже образом виде его. Они же написавше, принесоша к ней. Блаженная же видевше поклонися образу Ангела Господня, и не проглагола ничто же, и паки рукою помавая, повеле иным образом написати икону Ангела Господня. Они же написавше другую икону Ангела Божия, и тому принесену бывшу к ней, она же видевши такоже поклонися, и не проглагола ничто же. И еще показуя рукою, повеле третию икону написати иным подобием Ангельского образа. Егда же написан бысть третий образ Святаго Божия Архистратига Михаила, о великое чудо! Токмо святаго образа того блаженная, и абие раз-решися юза языка ея, и начать глаголати чисто, благодарствуя и славя Бога, и себе уверяя, яко таковым подобием виде явльшагося ей Ангела; сего же образа наипаче любезно почиташе, ему же покланялся и целуя, и постави его в церкви своей Рождества Пресвятыя Богородица, идеже и доныне стоит.

Глава 19

О прозрении слепаго, и о исцелении недужных, и о преставлении Великия Княгини Евдокии.

Прочее же Христолюбивая Великая Княгиня Евдокия по воле Божии житие свое препроводи, и волею своею всего мирскаго пребывания и царства временнаго отлучашеся, и во иноческий образ облещися возжела, и поиде из царскаго дому своего в монастырь, его же сама создала во имя Христова Вознесения. Идущи же ей от великия соборныя церкви Пречистыя Богоматери, и се некто слепец на пути слыша, яко Великая Княгиня грядет, в монастырь, и возопи гласом великим, глаголя: о госпоже боголюбивая Великая Княгиня наша! Нищих питательница, мы нищи всегда всяк довол пищи и одежи имехом от тебе, и ныне мене слепотою многа лета стражущаго не презри, но сотвори со мною милость, якоже обещася дати ми прозрение. Ибо видех тя в нощи сей во сне глаголющу ми: заутра дам ти прозрение. И се ныне время ти есть исполнити обещание свое. Блаженная же идый яко не внимаше глаголанным от него, и яко некоея ради потребы сверже с руки своея на землю рукав срачицы своея; слепый же ощути рукав ея в руку свою, и трепетом одержим бе, но обаче верою и любовию побежашеся, дерзну утерти рукавом ея слепотующая своея очеса, и абие прозре, и славяше Бога. Тогда же яко до тридесяти человек различными болезньми одержими исцеление получиша от блаженныя Великия Княгини Евдокии, во время шествия ея на пострижение в монастырь. Вшед в монастырь, иго Христово на ся восприим, и во иноческий образ облечеся, и претворено бысть имя ей Ефросиния, и трудолюбезно иночествова мног подвиг о Христе, и добродетельно течение соверши, и Богу угоди, к нему же и преставися с миром в лето 6915, месяца июня в 7 день, и положена бысть в своем ей монастыри, в церкви Вознесения Господня, и восприят наслаждения вечных благ и небесное царствие.